1Pe 1 | NAS | STEP | Ninge Piitai teie Jiisuuꞌ Karistooꞌkoong kara-okomui-nkai daarirerompimang diiꞌ Kumponing bakaning miruꞌnisinuka-anko, damisimainku deentariri otorimaing anke kansiꞌkoo, Jerusalemaꞌketa bataꞌdaariko aaꞌnairu-koo otori: Poontusi, Kalesia, Kapadosiaꞌ, Eesia eeꞌnoko Bitinia.

1 Peter 1

Niiꞌ Kumponing Bakaning Deemarira Tampaꞌ Oꞌnori Nempampiaing

(1:1–2:10)

1 Ninge Piitai teie Jiisuuꞌ Karistooꞌkoong kara-okomui-nkai daarirerompimang diiꞌ Kumponing bakaning miruꞌnisinuka-anko, damisimainku deentariri otorimaing anke kansiꞌkoo, Jerusalemaꞌketa bataꞌdaariko aaꞌnairu-koo otori: Poontusi, Kalesia, Kapadosiaꞌ, Eesia eeꞌnoko Bitinia. 2 Diiꞌ teing Kumponinge Niumai temuꞌketa tasiꞌdurira miruꞌruruꞌning, eeꞌnoko teie Tanuaang Meekunge meekaꞌantaruruꞌ, Jiisuuꞌ Karistooꞌ meumperiiꞌnaang, eeꞌnoko bakaang erenge kiiroraaꞌ antaruriiꞌnaang. Biraanke eeꞌnoko mooa diiꞌkoo beremparavaing.

Paning-koo Maneenaꞌ Oꞌnoriainaꞌ

3 Biraankeampiai tee Kumponing, Bauma teie niikaang Ovoring Jiisuuꞌ Karistooꞌ. Teie aaꞌnaꞌ piaamurira baurukaaꞌ deeng-antamuri pontoꞌantamuruꞌ nerakung domaang-koo domang purimariri nooruupiampiiꞌnaang maneenaꞌ oꞌnoriainaꞌ. 4 Teie tee, Jiisuuꞌ booꞌketa daaꞌantavuuꞌnooꞌka teeꞌ nkomuruꞌ, baurukaaꞌkoong barenku kompampiainaꞌ tasiꞌantamurima, tee eeꞌnung deraꞌpaaꞌ, orariaravaung eeꞌnoko paaꞌaravaunge. Kumponinge tee tampaꞌ tarereruri otokooꞌ teka paning-koo. 5 Eeꞌnoko masikaꞌantaveriko teie bakaang iriꞌke diiꞌ napoꞌ tarerurimatooꞌnaang bera tee domaang otoi-otoꞌ oko-antaruriainooꞌke basi. Aaꞌnung neriari otomaung Kumponinge siraꞌkoo teꞌmung asiꞌnaꞌmung sirakuraꞌ oko-antamurira. 6 Teeꞌkoo doturoturariri otoriaing tee doturotu pankaing damaꞌnung noruꞌeri bane parapaara arikananka kuneꞌerima anke kansiꞌkoo. 7 Teing arikananka teing diikaang masikaꞌanta paara-kooning, diiꞌ diikaang baito taaꞌniꞌpoi otoaing deekoꞌ. Kooro tee paaꞌkoo makosi bane ntaꞌke ivaiꞌuma paara-antavaamaunge tee taaꞌniꞌanta-koo, teka diikaang masikaꞌanta kooro-koo dau basinooꞌ tampara Kumponing-koo, eeꞌnoko teeꞌkoo teie parapaarai ntaꞌpinaꞌ paararuriko diikaang baito taaꞌniꞌpoi otoaing deekoꞌ tee aaꞌnoaing: daangang, meenasi eeꞌnoko miring pankaing aruriaing Jiisuuꞌ Karistooꞌ toroaravainaꞌmung.

8 Diiꞌke tee, bane ooveriarukoꞌnunge, nka pankaruntomperimaung tee. Napoꞌ teeꞌke enang ooveriaꞌ otoring tee, teka masikaꞌantaveri otong eeꞌnoko karange minku-paaꞌnaꞌ deto doturarima doturoturarimaung. 9 Aiꞌ diiꞌ teing tee kapooꞌ Jiisuuꞌkoo baitorarima piarorimaung nkaverimaing, tee tee diikaang uraang~koong domang-anta.

10 Tee domang-anta tee, teinge nakaro-nupoonge~ urikupoonge Kumponinge avusiroꞌari biraankemuriainaꞌ naumaarikoꞌninge tampaꞌ tasiꞌkoo eentavarima besiꞌaakoꞌ. 11 Tanuaang Meekunge Karistooꞌketainge eeꞌnara baikearara eeꞌnoko damaꞌke meenasi nkavuainaꞌ siraꞌpuma karantavuriko~ bateinang eeꞌnoko naninooꞌ noruꞌkoo piavorokoꞌ. 12 Teka Kumponinge nauvuruꞌ tavoꞌkuarooꞌnaang tenang teing otoroko, teka damaꞌke, enang-pinaꞌ diiꞌ otorimaatomanang makosinang. Eeꞌnoko enang Kumponinge tee Tanuaang Meekung paning-eta botovuioꞌ pakuvuriko niiꞌninge tee doorenang tampara siraꞌpaama nauraarieeng, teing nakaro-nupoong biikaang minkunaa ninka mantaꞌpai. Aing teing, bakei, koosinunankai aaꞌnaꞌ tampaꞌ oo-koo piavorokooꞌ.

Kumponinge Bokumuri Miruꞌmuruꞌnaꞌ Bakaning Meekupoong Oꞌnoriiꞌnaang

13 Teeꞌkoo diikaang onou maamurariri otoriaing Kumponing dotu-antaveriainaꞌ besiꞌeri, tarerariritaaꞌ, teꞌmung Jiisuuꞌ Karistooꞌ siraꞌpari poainaꞌmung Kumponinge avusiroꞌari biraankemuriaing tee narung nooruupieri. 14 Eeꞌnoko Kumponing baurukaaꞌ kara sionuka deentariri tee aarumo mono bakaang pia siong tero amakorariri nkorarikoꞌnung nkoveriaukaꞌ. 15 Teka teeꞌ eeꞌnaꞌ tee eeꞌnara diiꞌ bokururuꞌnung meekaꞌpari otomanaꞌ nariꞌ diiꞌ meekaꞌdariri otoriaing ookara nkoveriaining-koo. 16 Teeꞌ Daari Meekung-koo Kumponinge aaꞌpumanaꞌkoo,

“Diiꞌ meekaꞌdariri otoriaing, aiꞌ ning tee meekung.”
(Boontu 11:44)

Mooꞌ Bakei Pankainge Mooꞌmuruꞌnaꞌ Kumponinge

17 Kumponing Diuma tamperima tee tanatarariaing, aiꞌ tee tee eeꞌnara Kumponing Simpeꞌnko~ ookara-koo biikaang nko-nkonanka-koo makosinaꞌ, bane aremuriiꞌ naning. Aing batei-koo ootukuning-koo damisimainooꞌke otorimaing-koo diikaang aarumo koontariri otoriaing tee-koo meerupirariri. 18 Diiꞌke noruꞌeriaing diiꞌ teing napoꞌ mooꞌduruꞌning tevung-eta tampooꞌ beꞌkoo kaariꞌdarikoꞌnavung-eta diikakatauro biikaang minkunaa sintokosintoi-koong siomperiko, eeꞌnoko tamung mooꞌduriaꞌ kapooꞌke orariaramaing-pinaꞌ oroꞌke, aaꞌnoko kooro eeꞌnoko silivaꞌ. 19 Teka teie erenge makuꞌpaaꞌ Jiisuuꞌ Karistooꞌkoonge mooꞌduruꞌ teu kampianu orooꞌdopanu kiiroraaꞌnu ereng parekavaakoꞌnu-pinaꞌ nariꞌ miruꞌari. 20 Tee tee temuꞌketa miruꞌniiꞌ kansiꞌ pupuꞌaravaruko-ita, teka teie Kumponinge oroꞌantavuuꞌ tenang tee-koo batei-koo asiꞌnooꞌke diiꞌ paku-koo. 21 Tee-koo eeꞌnung-koo diiꞌke Kumponing masikaꞌantaverimaung, tee aaꞌnung tee Jiisuuꞌ booꞌketa daaꞌantavura meenasi avuuꞌ. Teeꞌkoo diikaang masikaꞌanta eeꞌnoko nenneng Kumponing-koo otoaing.

Niiꞌmaikororiꞌ Aaꞌnaꞌ Masikaꞌ Piaavarampiai

22 Enang tee diiꞌ tee kara masikung siomperira diikaang domang tee kiiroraaꞌdariring eeꞌnoko diiꞌ piaa masikung ninka piaareeri otoring. Teeꞌkoo narunaꞌ narunaꞌ aaꞌnaꞌ piaareeriai diikaang domang-eta namaiaꞌpinaꞌ. 23 Diiꞌ teing nerakaꞌdaririning, tee booaukaꞌnung-eta pontoꞌdariruꞌning, booaing-eta deeaꞌ, teka teieta Kumponing bakaang kara-ita domampari otoꞌketa. 24 Daari Meekunge aaꞌpumanaꞌ,

“Ookara nantoong biikaang domaang tee baaꞌ pinaꞌ namuꞌke booꞌ, eeꞌnoko biikaang meenasi tee iiooꞌ pinaꞌ namuꞌke maraꞌoma tankavarakooꞌ, teka tee Kumponing bakaang kara tee teeꞌ nariꞌ otomatoaing.”
(Aisaiaꞌ 40:6-8);

25 Tee aung kara tee eeꞌnung doorenang tampara diiꞌkoo daankiampimaung.